Davvisámegiella vuosttašgiellan 10. ceahkki
Dás gávnnat oppalašgova resurssain, ja dat leat ordnejuvvon bajitoasi fáttá mielde:
Lohkangealbbu ovdánahttin
Čáppagirjjálašvuođa ja áššeteavsttaid lohkamiin oahppit galget oažžut estehtalaš vásáhusaid ja beassat áššiin beroštišgoahtit. Sii galget imaštallat, oahppat ja áddet eará olbmuid jurdagiid ja eallineavttuid. Oahppit galget árvvoštallat teavsttaid ja kritihkalaččat reflekteret teavsttaid relevánssa, jáhkehahttivuođa ja váikkuhanfámu hárrái.
Giella vuogádahkan ja vejolašvuohtan
Oahppit galget šaddat oadjebas ja diđolaš giellageavaheaddjin girjás ja dárkilis gielain. Sii galget áddet hállangiela ja normerejuvvon čállingiela oktavuođa. Oahppit galget ovddidit gelbbolašvuođa ja oažžut hárjáneami giela vuogádaga ja struktuvrraid geavaheamis ja giela retoralaš ja estehtalaš beliin. Oahppit galget ovddidit metagiela ja doahpagiid vai áddejit ja máhttet válddahit giela giellaoahpalaš ja estehtalaš beliid. Oahppit galget áddet ja geavahit sámegiel doahpagiid, sániid ja dadjanvugiid, maiddái dakkáriid mat gullet loguide, sturrodagaide ja mihttoovttadagaide, go barget iešguđetlágan fáttáiguin ja teavsttaiguin.
Dáppe gávnnat oahppandoaimmaid ja gullevaš bargobihtáid gos oahppit besset reflekteret ja suokkardit iešguđet beliid kritihkalaš lohkamis, nu dego retorihka ja retoralaš váikkuhangaskaomiid. Go suokkardeaddji ja kritihkalaš vugiin lahkona gillii ja tekstii, de sáhttet oahppit oažžut hárjáneami mii nanne sin searvat servodahkii. Go hárjehallet dovdat retoralaš váikkuhangaskaomiid iešguđet oktavuođain ožžot oahppit eambbo vejolašvuođaid almmostahttit movt dákkár apeallavugiid atnet aktiivvalaččat váikkuhan dihte sidjiide, nu dego politihkas, máidnosiin, medias.
Giellagirjáivuohta Sámis
Oahppit galget ovddidit máhtu iešguđet guovlluid sámegiel girjáivuođa birra. Sii galget oažžut máhtu sámegielaid dili birra sihke historjjálaš ja dálááiggi perspektiivvas. Sii galget miehtásámi ja eamiálbmotperspektiivvas ovddidit gelbbolašvuođa ja diđolašvuođa giela, kultuvrra ja identitehta gaskasaš oktavuođaid birra.