Sámegiella vuostasjgiellan 3.-4. dáse
Dánna ressursajt gávna, badjásasj tiemáj milta tjuoldeduvvam:
Grammatihkka
Dát le álggooahppo báhkoklássaj birra, ja oahppe galggi verbaj, substantijvaj ja adjektijvaj
oahpásmuvvat. Dánna li iesjgeŋga dahkamusá oahppijda åmastittjat ienep dádjadusáv
báhkoklássaj birra. Gávnnuji dahkamusá iesjgeŋga dásen, vaj oahppijda sisadno máhttá
hiebaduvvat.
Rájddo báhkoklássaj birra. Dát rájddo l substantijva birra. Vuostasj oasen oahpástuvá substantijvajn. Nuppát oasen oahppe galggi oahppat avtalågo ja moattelågo birra. Goalmát oasse l nominatijva ja akkusatijva birra. Maŋemus oasen sieradip sierranamáj ja aktisasjnamáj gaskan. CoLaban, StoryLaban ja IdeaLaban li iesjgeŋgalágásj ja geldulasj dahkamusá. Dahkamusgirjen gávna aj suohtas dahkamusájt. Dánna gávna ienebuv praktihkalasj ja njálmálasj dahkamusájt. Iesj mierreda makkir gárggán laba galggi tjadáduvvat.
Rájddo verba báhkoklássa birra. Dánna li moatte lágásj dahkamusá maj oahppe máhtti barggat váj oahppi ienebut verba báhkoklássa birra. Vuostasj oases la vuogas åvddånibme nuppát oassáj mij joarkká goalmát oassáj. Vuostasj oasse l verbaj birra báhkoklássan. Nuppát oasse joarkká bargojn pronåvmåj mån, dån ja sån. Dán oasen barggá aj presensijn. Goalmát oasen barggap måj, dåj ja såj pronåvmåj, ja preterihtajn. Lisj dávk vuogas vuostasj oasev dahkat 3. klássan, nuppát oasev maŋŋela jagen ja goalmát oasev 4. klássan.
Rájddo báhkoklássaj birra. Dát rájddo l adjektijva birra. Dánna li iesjgeŋgalágásj dahkamusá. Le vuogas progresjåvnnå vuostasj oases nuppát oassáj.
Låhkåmávvo
Dán rájdon li dagádum låhkåmgirje fágajgasskasasj tiemáj ja sierraláhkáj guoddelis
åvddånibme l guovdátjin. Girje li tjanádum oahppij ájggegávddaj ja sáme kultuvrraj ja
subtsastimárbbedáhpáj. Juohkka girjjáj li dagádum moadda dahkamusá gånnå oahppe galggi
adnet sáme moallánagájt ja bágojt. Oahppe oadtju dan bargo tjadá vijdes åtsådallamav
adnet njálmálasj máhtudagáv tjanádum sijá låhkåm- ja tjállemmáhtudagá åvddånibmáj.
Låhkåmgirje li sihke digitála ja páhperhámen.
Resursa degu aktisasjoase, gielladahkamusá ja ájádallamdahkamusá ma “Fierván”-girjjáj gulluji.
Resursa degu aktisasjoase, gielladahkamusá ja ájádallamdahkamusá ma “Muohta l dan namma”-girjjáj gulluji.
Resursa degu aktisasjoase, gielladahkamusá ja ájádallamdahkamusá ma “Tjuovgga sjævnnjadin dánssamin”-girjjáj gulluji.
Resursa degu aktisasjoase, gielladahkamusá ja ájádallamdahkamusá ma “Várev sirddet”-girjjáj gulluji.
Sjáŋŋar
Dánna oahppe bessi sæbrrat mielludahtte båddåj iesjgeŋga sjáŋŋarij birra. Oahppe oadtju
gullat suohtas lávllagijt ja fáktádiedojt ja geldulasj subttsasijt ja dijdajt. Dánna aj galggi
oahppat ietjá iemeálmmugij birra ja oahpásmuvvat iesjgeŋga væráldaåsij. Navti oahppe
åmasti máhtudagáv ja diedulasjvuodav giela, kultuvra ja identitiehta aktijvuoda birra, sáme-
ja iemeálmmukperspektijvan.
Moattebelak tevstaj tjadá, duoddedahkamusáj gånnå oahppe galggi dåjmalattjat barggat,
oahppi oahppe dádjadit tevsta sisanov, árvustallat, ja duodden aj gávnnat diedojt iesjgeŋga
sjáŋŋarin. Dá li vuodo máhtudagá ma li ájnnasa tevsta dádjadibmáj.
Sámegielan vuostasjgiellan galggá oahppij oahppohábbmimav nannit ja jut åvddånahtti guovtegielakvuodav ja sjaddi jasska ietjasa gielalasj ja kultuvralasj identitiehttaj moattekultuvralasj sebrudagán. Dán rájdon lip moatte væráltåsij subttsasijt válljim. Oahppe oahpástuvvi iesjguhtik lándajda, gielajda ja tjállemgielajda. Rájdo baktu aj iesjguhtik kultuvrajt ja lándajt åvdet ja árvon adná klássan. Lávkij baktu sjaddi oahppe tevstav moaddi låhkåt ja sihke tevsta sisadnuj ja vuogádahkaj tjiegŋodit.
Dán rájdon li duon dán oahppamresursa dålusj subttsasij ja båvaj hárráj. Oahpásmahttem-CoLaban bessabihtit aktan ságastallat subtsastallamvuogij, dålusj subttsasij, båvaj ja duoj dáj ilmenieraj ja viessogij birra. StoryLabajn li guovtelágásj dahkamusá. Guovten girjen li båva ja nieljen girjen li dålusj subttsasa. Dájn girjijn ælla gåvå ja oahppe galggi bielijt hiervvit, juohkusijn jali aktu. Girje máhtti PDF:an vuorkkiduvvat, tjáledahteduvvat ja nav oassen sjaddat oahppij ietjasa girjjevuorkájs. “Muv girjje”- StoryLaba le viehkken gå oahppe galggi tjállet duoj dáj ilmenieraj ja viessogij birra ma gávnnuji árbbedábálasj subttsasijn.
Rájddo sihtá oahppijt måvtåstuhttet, berustahttet ja låhkåmmielav vaddet suohtas lávllagij ja fáktáj tjadá. Rájddo nuppát låhkåmåhpadimev tjuovvu; oahppat låhkåt dav mij ij la tjáledum, dålkkut, árvustallat ja tevstas diedojt åttjudit. Dá li vuodulasj låhkåmtjehpudagá váj máná ja nuora galggi ållåsit ávkev oadtjot ietjasa iellemis tevstaj væráldin.