Fágajgasskasasj tiemá 3.-4. dáse
Dánna ressursajt gávna, badjásasj tiemáj milta tjuoldeduvvam:
Demokratijja ja viesátguojmmevuohta
Demokratijja ja viesátguojmmevuohta fágajgasskasasj tiebmá oahppijda vaddá máhtov ja dádjadusáv demokratijjalasj árvoj ja prinsihpaj hárráj vaj máhtti demokratijjalasj prosessajt hábbmit ja dajda sæbrrat. Åhpadibme galggá oahppijda vaddet dádjadusáv gåktu demokratijja ja guovdásj almasjrievtesvuoda dagu moalgedimfriddjavuohta, jienastimriektá ja organisasjåvnnåfriddjavuohta aktij gulluji. Galggi bessat dádjadit demokratijjan li moatte lágásj háme ja vuoge.
Oahppe galggi aj demokratijjalasj institusjåvnåj åvddånimev dádjadit Sámen, ja gåktu sijdda la læhkám ja la ájn akta vuohke ietjas organisieritjit demokratijjalattjat. Dát aj guosská sámij bargguj rijkajgasskasasj iemeálmmukaktisasjbargujn ja rijkajgasskasasj sjiehtadusájn ja konvensjåvnåj merkadusán demokratijjalasj åvddånibmáj. Bargadijn sebrudakfágajn galggi oahppe ájádallat lájttálisát, válldet iesjguhtik perspektijvajt, giehtadallat dágástallamijt ja vuosedit dåjmalasj viesátguojmmevuodav.
.
Dáj ressursaj baktu oahpásmuvvi oahppe mánájkonvensjåvnåjn ja mánáj rievtesvuodaj birra oavdduhim lahkanimijn. Lahkanibme ássjáj la juoga majt oahppe dåbddi ietjas iellemin ja duohtavuodan ja danen máhttá tjiekŋalappo dádjaduvvat, duola degu árvvo liehket sierralágásj ulmusj ja vuorodit dav mij la ájnnasamos ietjas iellemin.
Dájna bargadijn galggi oahppe máhtov låpptit Sáme birra ja reflektierit majt merkaj liehket oassen Sámes ja gåktu ietja dåbddi gulluji dán bájke iesjgeŋga vidjurijda.
Dát rájddo l fágajgasskasasj tiemá birra mij guosská demokratijjaj ja guojmmeviesátvuohtaj. 2.dáse maŋnela galggá oahppe ájádallat manen ulmutjijn la iesjgeŋgalágásj vuojnno ja manen iesjgeŋgaláhkáj válljiji. Dán rájdon gávna geldulasj dahkamusájt tiemá birra.
Dánna gávna labajt ja dahkamusájt majt máhttá skåvllåjage álgon adnet ja aj skåvllåjagev miehtáj. Vuostasj lában oadtju oahppe máhttelisvuodav subtsastit gåktu giesse l læhkám ja juogadit sijá sávadusájt boahtte skåvllåjage hárráj. Dát labba doajmmá buoragit oassálasstemij ja suohtas «icebreaker» álgon ådå skåvllåjages. Dahkamuslaban bessi oahppe divtajt ja subttsasijt tjállet ja sárggot. Maŋemus laban li klássanjuolgadusá guovdátjin. Labba la hiebadum mánájskåvllåoahppijda, valla huoman máhtti oahppe alep dáses aj dáv tjadádit.
Álmmukvarresvuohta ja bierggim
Tiebmá galggá viehkken dádjadit gåktu iehtjádij siegen doajmmá, aj digitála láhkáj, vájkkut relasjåvnåjda ja gullevasjvuohtaj la aj oassen fága máhtudagás. Tiebmá galggá vájkkudit jut oahppe máhtti buoragit válljit iellemin ja giehtadallat hásstalusájt ma li tjanádum seksualitiehttaj, persåvnålasj ruhtadilláj, gárevselgajda, ålgoduvvamij ja digitála ulmutjahttemij. Tiebmá galggá aj hábbmit dádjadusáv, vieledimev ja gierddisvuodav moattebelakvuohtaj, iehtjádij árvojda ja iellemválljimijda, ja vaddet perspektijvajt dasi mij buorre iellem máhttá liehket. Oahppe galggi máhttet identifisierit suorgijt gånnå ulmusjárvvo ájteduvvá, duola degu ulmusjoasestime ja dálásj ájge oarjjevuoda aktijvuodan, ja vuosedit dåjmajda ma ulmutjij vuododárbojt várajda válldi.
Álmmukvarresvuohtaj la viek ájnas ahte sebrudahka dilev láhtjá váj juohkka aktugasj bæssá buoragit válljit ietjas varresvuoda hárráj. Bierggim merkaj buktet dádjadit ja vájkkudit faktåvråjt ma rijbbamij vájkkudi. Tiebmá galggá viehkken váj oahppe oahppi giehtadallat miehtebiekkajt ja vuosstemannamijt giehtadallat, ja persåvnålasj ja praktihkalasj tjuolmajt buoremus láhkáj.
